O evento para amantes do cómic regresará os próximos 12, 13 e 14 de maio para “encher o calvario de paixón polo cómic” coa participación de guionistas, debuxantes e artistas deste sector.
Despois dunha exitosa primeira edición, o barrio vigués do Calvario recupera o evento Banda á Feira os próximos 12, 13 e 14 de maio. Esta segunda edición transcorrerá en diferentes espazos do barrio, como os arredores do mercado e os diferentes locais da Asociación de Vecinos do Calvario, organizadora do evento xunto a Norma Cómics e Clases de Cómic Vigo.
Encabezando o cartel de invitados chega Juan Díaz Canales, guionista de Blacksad, unha das series máis exitosas con máis dun millón de exemplares vendidos e gañadora do Premio Nacional de Cómic no ano 2014; Teresa Valero, guionista e autora integral de obras como Contrapaso, con máis de 300.000 exemplares vendidos; Miguelanxo Prado, o historietista galego máis importante e gañador do Premio Nacional do Cómic en 2013 con Ardalén.
Así mesmo, tamén estarán Kenny Ruiz, un dos autores españois que traballa regularmente para o esixente mercado xaponés do manga coa súa obra Team Phoenix; e Miriam Bonastre, unha das artistas de webtoon máis importantes grazas a Hooky, da que vendeu máis de 150.000 exemplares de cada volume.
Máis información: